ភ្នំពេញ៖ បុរសពីរនាក់បាន ស្លាប់នៅនឹងកន្លែងកើតហេតុយ៉ាងអណោចអធ័ម បន្ទាប់ពីបានជិះម៉ូតូមួយគ្រឿងត្រូវរថយន្តមិនស្គាល់ម៉ាកបើកបុកពេញទំហឹង រួចបើក រត់បាត់កាលពីវេលាម៉ោង០៩យប់ថ្ងៃអាទិត្យ ទី៣០ ខែសីហាឆ្នាំ ២០២០នៅចំណុចជាប់របងដីឡូត៍មួយកន្លែង តាមបណ្តោយផ្លូវបេតុង ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
សពជនរងគ្រោះទី១មានឈ្មោះ កាន អាយុ ២០ ឆ្នាំជាង មុខរបរធ្វើសំណង់ ស្នាក់នៅម្ដុំវត្តសន្សំកុសល ខណ្ឌមានជ័យ មានស្រុកកំណើត ភូមិចក ឃុំសំរោងស្រុកស្វាយអន្ទរ ខេត្តព្រៃវែង។ទី២មានឈ្មោះ ផន សុវណ្ណះ ភេទប្រុសអាយុ២២ឆ្នាំ មុខរបរដូចគ្នា មានស្រុកកំណើត ភូមិជ្រោយដង ឃុំសំរោងទង ស្រុកកៀនស្វាយ ខេត្តកណ្តាល។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសពីរនាក់ជិះម៉ូតូមួយគ្រឿងម៉ាក ហុងដាវ៉េវ ពណ៌ខ្មៅ ពាក់ស្លាកលេខ ព្រៃវែង1M-8712ធ្វើដំណើរតាមបណ្តោយផ្លូវបេតុង ទិសដៅពីកើតទៅលិច លុះមកដល់ចំណុចកើតហេតុខាងលើក៏មានរថយន្តមួយគ្រឿងមិនស្គាល់ម៉ាកបានធ្វើដំណើរបញ្ច្រាស់ទិសដៅគ្នាពី លិចទៅកើតបានជ្រុលទៅបុកម៉ូតូបណ្តាលឲ្យបុរសទាំងពីរ នាក់ដួលបោកនឹងថ្នល់ស្លាប់នៅនឹងកន្លែងកើត ហេតុភ្លាមៗ។ចំណែករថយន្តបង្កបានបន្ថែមល្បឿនរត់គេចខ្លួនបាត់ស្រមោល។
ក្រោយកើយហេតុសមត្ថកិច្ចបានចុះមកដល់និងមានសាច់ញាតិជនរងគ្រោះម្នាក់បាន ចុះមកដល់កន្លែងកើតហេតុ បន្ទាប់មកសមត្ថកិច្ចបានទំនាក់ទំនងទៅសមត្ថកិច្ចជំនាញចុះមកយកម៉ូតូទៅរក្សាទុកបណ្ដោះអាសន្ន។ដោយឡែកសពជនរងគ្រោះត្រូវធ្វើកំណត់ហេតុរូចប្រគល់ជូនសាច់ញាតិទាំងពីយកទៅស្រុកកំណើតធ្វើបុណ្យតាមប្រពៃណី៕
