ក្លឹបយក្សអេស្ប៉ាញ Real Madrid បានប្រកាសកាលពីម្សិលមិញនេះថាពួកគេបានបង្កើតក្រុមបាល់ទាត់នារីជាផ្លូវការហើយ ក្រោយពីត្រៀមរៀបចំក្រុម១ឆ្នាំមកនេះ។
ក្រុមបាល់ទាត់នារីថ្មីរបស់ Real Madrid នេះដែរ នឹងផ្ដោតខ្លាំងទៅលើការបណ្ដុះបណ្ដាលថ្នាលរបស់ខ្លួន ជាជាងការទិញយកកីឡាករល្អៗពីក្រៅមក។ ដោយប្រាក់ចំណាយទាំងអស់ នឹងយកចេញពីថវិការចំណាយសរុបរបស់ក្រុមបុរស Real Madrid តែម្ដង។ នេះជាលើកដំបូងហើយសម្រាប់ក្រុម Real Madrid ដែលបង្កើតក្រុមនារីនេះឡើយ ដោយពួកគេបានរៀបចំគម្រោងរយៈពេលយូរឆ្នាំដែរមកហើយ។
ដោយឡែកបើងាកទៅមើលក្រុមដទៃទៀតវិញ ក្នុងប្រទេសអេស្ប៉ាញសុទ្ធតែមានក្រុមបាល់ទាត់នារីជាយូរមកហើយ។ ដោយក្រុមនារីដែលជោគជ័យខ្លាំងជាងគេនៅអេស្ប៉ាញ បច្ចុប្បន្ននេះមាន២គឺ Athletic Bilbao និង Barcelona ដែលធ្លាប់បានឈ្នះជើងឯក៥ដងដូចគ្នា៕
ប្រភព៖ Marca
