អាជ្ញាធរជាតិអប្សរា ប្រមូលទឹក រក្សាទុក ប្រើប្រាស់ ក្នុងរដូវប្រាំង

ក្នុងការងារនេះ អាជ្ញាធរជាតិអប្សរាបានបង្ហាញនូវអារម្មណ៍ជាទីមោទនបំផុត ក្នុងការប្រមូលទឹកស្ដុកទុកដើម្បីបម្រើកិច្ចការអភិរក្សប្រាសាទ ក៏ដូចជាត្រៀមសម្រាប់ចែកចាយដល់ប្រជាពលរដ្ឋក្នុងតំបន់សម្រាប់ប្រើប្រាស់នារដូវប្រាំងខាងមុខនេះ។

លោក ភឿន សុឃីម អនុប្រធាននាយកដ្ឋានគ្រប់គ្រងទឹកនៃអាជ្ញាធរជាតិអប្សរា ឱ្យដឹងថា នាពេលបច្ចុប្បន្ននេះ ក្រុមការងាររបស់លោកបានខិតខំ និងប្រមូលទឹកស្ដុកទុក ស្ទើរពេញទាំងស្រុងនៅតាមកសិន្ធុអង្គរវត្ត កសិន្ធុក្រុងអង្គរធំ បារាយណ៍ខាងជើង បារាយណ៍ខាងលិច និងតាមទំនប់នានា ដោយរំពឹងថា នារដូវប្រាំងខាងមុខនេះ ពុំមានកង្វះទឹកប្រើប្រាស់ឡើយ។ លោកបន្ថែមថា កម្រិតទឹកដែលបានបញ្ចូលនៅពេលនេះ គឺស្ថិតក្នុងកម្រិតអតិបរិមា។

លោក ភឿន សុឃីម ពន្យល់បន្ថែមថា ក្រោយពីអាជ្ញាធរជាតិអប្សរារៀបចំស្ដារឡើងវិញនូវប្រព័ន្ធធារាសាស្រ្ដបុរាណមក គឺការងារគ្រប់គ្រងទឹកមានភាពងាយស្រួល ពិសេសបញ្ជៀសទឹកភ្លៀងមិនឱ្យជន់លិចតំបន់អង្គរ និងក្នុងក្រុងសៀមរាប។ ការងារបញ្ជៀសទឹកនេះ គឺអ្នកជំនាញទឹករបស់អាជ្ញាធរជាតិអប្សរា បានធ្វើការបង្ហូរទម្លាក់ទៅតាមដៃស្ទឹងមួយចំនួន ក៏ដូចជាតាមប្រឡាយជាដើម។