ភ្នំពេញ ៖ ជនសង្ស័យ៥នាក់ ដែលជិះម៉ូតូកង់បី ធ្វើសកម្មភាពគាស់សោផ្ទះពលរដ្ឋ លួចយកទ្រព្យសម្បត្តិ ត្រូវបានប៉ូលិសខណ្ឌដង្កោចាប់ខ្លួនបាន កាលពីវេលាម៉ោង០២និង៣០នាទី រំលងអធ្រាត្រ ឈានចូលថ្ងៃទី ១១ខែកញ្ញា ឆ្នាំ២០២០ ត្រង់ចំណុចបុរីឡាយគង់ ផ្លូវលេខ៣ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
លោកវរសេនីយឯក ជឹម ស៊ីថា អធិការនគរបាលខណ្ឌដង្កោ បានឱ្យដឹងថា ជនសង្ស័យ០៥នាក់រួមមាន ១-ឈ្មោះ ម៉ិញ សំណាងភេទប្រុស អាយុ៣១ឆ្នាំ មុខខរបររត់កង់បីឥណ្ឌា ២-ឈ្មោះ សេង ជីវ័ន្ត ភេទប្រុស អាយុ១៨ឆ្នាំ មុខរបរមិនពិតប្រាកដ ៣-ឈ្មោះយឿន យ៉ាវ ភេទប្រុស អាយុ២០ឆ្នាំ មុខរបរមិនពិតប្រាកដ ៤-ឈ្មោះ យឿន ពៅ ភេទប្រុស អាយុ២២ឆ្នាំ មុខរបរមិនពិតប្រាកដនិង៥-ឈ្មោះ ខែក សុភារ៉ា ភេទប្រុស អាយុ២៣ឆ្នាំ មុខរបររត់ ម៉ូតូកង់បីឥណ្ឌា ។ វត្ថុតាងចាប់យក ម៉ូតូកង់បីឥណ្ឌាចំនួន០២គ្រឿង ,ម៉ូតូចំនួន០១គ្រឿង និងទូរស័ព្ទដៃចំនួន០៣គ្រឿង។
លោកបន្តថា កម្លាំងប៉ូលិសប៉ុស្តិ៍រដ្ឋបាលដង្កោ បានសហការជាមួយកម្លាំង ប៉ូលិសផ្នែកជំនាញខណ្ឌដង្កោ បានជិះម៉ូតូល្បាត ក្នុងភូមិសាស្ត្រ រហូតដល់ចំណុច បុរីឡាយគង់ ផ្លូវលេខ៣ ភូមិម័ល សង្កាត់ដង្កោ ខណ្ឌដង្កោបានឃើញ ជនសង្ស័យមួយក្រុម កំពុងធ្វើសកម្មភាព លួចឆ្កឹះសោផ្ទះរបស់ប្រជាពលរដ្ឋ ហើយក៏បានធ្វើការឡោមព័ទ្ធ ឃាត់ខ្លួនជនសង្ស័យ បានជាបន្តបន្ទាប់៥នាក់ខាងលើ។
ក្រោយពីធ្វើការសាកសួរ ជនសង្ស័យបានឆ្លើយសារភាព ប្រាប់ថា ពួកគេ(ជនសង្ស័យ) ពិតជាបាននាំគ្នា ធ្វើសកម្មភាពគាស់ផ្ទះរបស់ប្រជាពលរដ្ឋ ដើម្បីលួចយកទ្រព្យសម្បត្តិ ប្រាកដមែន។ ហើយកន្លងមកពួកគេ (ជនសង្ស័យ) ក៏ធ្លាប់បានធ្វើសកម្មភាពលួចគាស់ បង្អួចផ្ទះ និងឆ្កឹះសោទ្វារផ្ទះ របស់ប្រជាពលរដ្ឋ លួចយកទ្រព្យសម្បត្តិ ជាច្រើនលើកទៀតផង យកទៅលក់បាន យកលុយទិញថ្នាំញៀនជក់ និងផឹកស៊ីជាមួយ បក្ខពួកដទៃទៀត ៕
